महाराष्ट्र
20031
10
भगवानगडाला पाणी देणाऱ्या विहिरीत सापडले 8 दुचाकींचे सांगाडे; परिसरात खळबळ
धक्कादायक! भगवानगडाला पाणी देणाऱ्या विहिरीत सापडले 8 दुचाकींचे सांगाडे; परिसरात खळबळ…
पाथर्डी तालुका न्यूज नेटवर्क-
पाथर्डी तालुक्यातील श्री क्षेत्र भगवानगडाला पाणीपुरवठा करणाऱ्या घोगस पारगाव रस्त्यावरील एका जुन्या विहिरीतून गाळ काढताना कामगारांना तब्बल आठ मोटारसायकलचे सांगाडे आणि अवशेष आढळून आल्याने परिसरात खळबळ उडाली आहे. दुष्काळी परिस्थितीमुळे या विहिरीतील पाणी पूर्णपणे आटल्याने मोठ्या प्रमाणात साचलेला गाळ उपसण्याचे काम नुकतेच सुरू करण्यात आले होते, ज्या दरम्यान हा धक्कादायक प्रकार उघडकीस आला. पाथर्डी पोलिसांनी घटनास्थळी धाव घेऊन हे अवशेष ताब्यात घेतले आहेत. प्राथमिक पाहणीत या दुचाकी 'हिरो होंडा' आणि 'बजाज' कंपनीच्या असाव्यात असा अंदाज आहे, मात्र अनेक वर्षे पाण्यात आणि गाळात राहिल्याने त्यांना मोठा गंज चढला असून त्यांची नेमकी ओळख पटवणे कठीण झाले आहे. चोरट्यांनी या गाड्या चोरल्यानंतर गुन्ह्याचा पुरावा नष्ट करण्यासाठी व पोलिसांच्या तपासापासून वाचण्यासाठी त्या मुद्दाम या विहिरीत टाकल्या असाव्यात, असा संशय व्यक्त केला जात आहे. या दुचाकी नेमक्या कोणाच्या आहेत, त्या कधी आणि कोणी विहिरीत टाकल्या, तसेच त्यांचा वाहन चोरीच्या गुन्ह्यांशी काही संबंध आहे का, याचा सखोल तपास आता पाथर्डी पोलिसांना करावा लागणार आहे.
20031
10
