महाराष्ट्र
864
10
दोघा तरुणांच्या मृत्यूने पसरली शोककळा! एकाचा अपघाती मृत्यू तर दुसर्‍याने गळफास घेत संपविले जीवन..
दोघा तरुणांच्या मृत्यूने पसरली शोककळा! एकाचा अपघाती मृत्यू तर दुसर्‍याने गळफास घेत संपविले जीवन..
नगर सिटीझन live टिम प्रतिनिधी
गेल्या काही दिवसांपासून विविध घटनांनी चर्चेत असलेल्या संगमनेर शहरात एकाचवेळी समोर आलेल्या दोन दुर्दैवी घटनांनी शोककळा पसरली आहे. यातील पहिल्या घटनेत आज पहाटे पाऊणे एक वाजण्याच्या सुमारास संगमनेर खुर्द शिवारात झालेल्या भीषण अपघातात कृष्णा सुभाष करपे हा तरुण व्यावसायिक ठार झाला, तर आज सकाळी वाडेकर गल्लीतील अवघ्या सोळा वर्षाच्या श्रेयस गणेश वाडेकर याने आपल्या घरातच गळफास घेवून आत्महत्या केली. ऐन सणासुदीच्या काळात समोर आलेल्या या दोन्ही घटनांनी संपूर्ण शहरातून हळहळ व्यक्त करण्यात येत असून शहरावर शोककळा पसरली आहे.
याबाबत मिळालेल्या माहितीनुसार माऊली डेकोरटर या फर्मचा चालक असलेला कृष्णा सुभाष करपे (वय 28, रा.कुंभारआळा) हा तरुण एका कार्यक्रमाची ऑर्डर पूर्ण करण्यासाठी सोमवारी (ता.25) सायंकाळी संगमनेर खुर्द शिवारातील कुबेर लॉन्स येथे गेला होता. आज पहाटे साडेबाराच्या सुमारास त्याचे कामकाज आटोपल्यानंतर तो घरी येण्यासाठी आपल्या स्वीफ्ट कंपनीच्या कारमधून (क्र.एम.एच.03/ए.एम.9981) निघाला. यावेळी संगमनेर खुर्द शिवारातील शिवनेरी पतसंस्थेपासून संगमनेरच्या दिशेने वळण घेत असताना त्याचे आपल्या वाहनावरील नियंत्रण सुटल्याने तो थेट समोरुन येणार्‍या मालट्रकवर जावून आदळला.
हा अपघात इतका भीषण होता की धडकेनंतर स्वीफ्ट कारच्या दर्शनीभागासह डाव्या बाजूचा अक्षरशः चुराडा झाला. या अपघाताने मोठा आवाज झाल्याने आसपासच्या काही नागरिकांनी तत्काळ घटनास्थळाकडे धाव घेतली. यावेळी कारमध्ये रक्ताच्या थारोळ्यात फसलेल्या तरुणाला स्थानिकांनी बाहेर काढून खासगी रुग्णालयात दाखल केले. मात्र अतिरक्तस्राव झाल्याने उपचारापूर्वीच त्याचे निधन झाले. मयत झालेला तरुण शहरातील सर्वपरिचित व्यापारी सुभाष करपे यांचा एकुलता एक मुलगा, तर भारतीय जनता पक्षाचे ज्येष्ठ कार्यकर्ते, माजी नगरसेवक ज्ञानेश्वर करपे यांचा तो पुतण्या होता. त्याच्या पश्चात आई-वडील व तीन विवाहित बहिणी असा परिवार आहे. आज सकाळी साडेअकराच्या सुमारास त्याच्यावर अंत्यसंस्कार करण्यात आले.
दुसरी दुर्दैवी घटना शहरातील वाडेकर गल्लीतून समोर आली. या परिसरात राहणार्‍या इयत्ता अकरावीतील अवघ्या सोळा वर्षांच्या श्रेयश गणेश वाडेकर या तरुणाने मानसिक संतापातून आपल्या राहत्या घरातच पंख्याला गळफास घेत आपली जीवनयात्रा संपविली. सदरचा प्रकार समोर आल्यानंतर त्याच्या आई-वडीलांनी तातडीने त्याला रुग्णालयात दाखल केले, मात्र तत्पूर्वीच तो मृत्यू पावला होता. या घटनेने वाडेकर गल्लीसह रंगारगल्ली, चंद्रशेखर चौक परिसरात शोककळा पसरली असून इतक्या लहान वयाच्या तरुणाने इतक्या टोकाचे पाऊल उचलल्याने हळहळ व्यक्त केली जात आहे.
मयत तरुणाचे वडील संगमनेर नगरपरिषदेत लिपीक पदावर तर त्याची आई घुलेवाडीच्या ग्रामीण रुग्णालयात परिचारिका म्हणून सेवेत आहे. या दोन्ही घटना दिवाळीच्या ऐन तोंडावर घडल्याने संगमनेरातून हळहळ व्यक्त केली जात आहे. गेल्या काही दिवसांत विविध गुन्हेगारी घटना, हिंदुत्त्वादी संघटनांचे आंदोलन, पोलीस अधिकार्‍यांवरील कारवाईच्या चर्चा आणि त्यातून रंगलेले थोरात-विखे राजकीय नाट्य यामुळे संपूर्ण राज्यात चर्चेत असताना कृष्णा करपे याचा अपघाती तर श्रेयस वाडेकर याच्या अकस्मात मृत्यूच्या वार्तेने संपूर्ण शहरावर शोककळा पसरली आहे.
864
10
