महाराष्ट्र
2505
10
बनावट दूध बनवण्याचे दोन अड्डे उध्वस्त पोलिसांची मोठी कारवाई
बनावट दूध बनवण्याचे दोन अड्डे उध्वस्त पोलिसांची मोठी कारवाई
नगर सिटीझन live टिम प्रतिनिधी
जामखेड तालुक्यातील खर्डा भागातून बनावट दूध तयार करण्याचे आणखी एक रॅकेट जामखेड पोलिसांनी उघडकीस आणले आहे. खर्डा व नागोबाचीवाडी येथील बनावट दूध बनवण्याचे अड्डे उध्वस्त करीत २ हजार ११८ लिटर बनावट दूध नष्ट करण्यात आले आहे. तसेच तब्बल दोन लाख रुपयांचे बनावट दूध बनवण्याचे साहित्य जप्त करण्यात आले आहे. ही कारवाई पोलिस निरीक्षक संभाजीराव गायकवाड यांच्या नेतृत्वाखालील अन्न व औषध विभागाने पार पाडली. या कारवाईमुळे बनावट दूध बनविणाऱ्यांचे धाबे दणाणले असून एकच खळबळ उडाली आहे.
नागोबाचीवाडी येथील हरिभाऊ एकनाथ गोपाळघरे यांच्या मालकीच्या खर्डा व नागोबाचीवाडी येथील भगवानकृपा दूध संकलन केंद्रावर बनावट दूध तयार केले जात असल्याची माहिती पोलिस निरीक्षक संभाजीराव गायकवाड यांना मिळाली होती. या माहितीची खातरजमा होताच जामखेड पोलिसांनी तातडीने २८ रोजी सकाळीच अन्न व औषध प्रशासनाच्या पथकाला सोबत घेत खर्डा भागात संयुक्त छापे टाकले. खर्डा भागातील नागोबाचीवाडी येथून ८७८ लिटर तर खर्डा येथून १ हजार २४० लिटर असे एकूण २ हजार ११८ लिटर बनावट दुधाचा मोठा साठा हस्तगत केला. तर १ लाख ९० हजार रुपयांचे बनावट दूध तयार करण्याची पावडर, केमिकल, व अन्य साहित्याचा साठा घरातून व दूध संकलन केंद्रातून जप्त करण्यात आला आहे. अन्न व औषध प्रशासनाने जप्त केलेले बनावट दूध जागेवर नष्ट केले आहेत. तर बनावट दूध तयार करण्यासाठी वापरलेले साहित्य अन्न औषध प्रशासनाने ताब्यात घेतले आहे. बनावट दूध तयार करण्याचे जप्त केलेल्या साहित्याचे नमुने पुढील तपासणीसाठी प्रयोगशाळेत पाठवण्यात आल्याची माहिती अन्न सुरक्षा अधिकारी उमेश सुर्यवंशी यांनी दिली.
2505
10
