'या' सहा पथकातील अधिका-याची जिल्ह्यात ऑक्सिजन नियंत्रणासाठी  नेमणूक 

नगर सिटीझन live टिम प्रतिनिधी - बुधवार  05 मे 2021

नगर जिल्ह्यात आॕक्सीजनचा तुटवडा मोठ्या प्रमाणात जाणवत असल्याने जिल्हाधिकारी यांनी सहा पथके तयार केली असून या पथकातील अधिकारी ऑक्सिजन प्लांटवर थांबून नियोजन करतील.

ऑक्सिजनचा तुटवडा असल्याने अनेकजण ऑक्सिजन प्लांटच्या परिसरात गर्दी करतात. त्यामुळे वाद-विवादाचे प्रसंग निर्माण होऊन सुरक्षेचा धोका निर्माण होऊ शकतो, ही शक्यता लक्षात घेऊन संबंधित प्लांटच्या ठिकाणी सुरक्षेच्या दृष्टीने पोलिस बंदोबस्तही तैनात केला आहे.

या पथकातील अधिकारी ऑक्सिजन प्लांटवर थांबून नियोजन करतील. याबाबत निवासी उपजिल्हाधिकारी संदीप निचित यांनी नोडल अधिकारी व रिफिलर प्लांटधारकांची संयुक्त बैठक घेऊन त्यासंदर्भात सूचना केल्या आहेत.

'अहमदनगर इंडस्ट्रियल या गॅस प्लांटसाठी रिपाेर्टींग ऑफिसर म्हणून उपजिल्हाधिकारी पल्लवी निर्मळ, तर इन्चार्ज ऑफिसर म्हणून सहायक पुरवठा अधिकारी किशोर कदम आणि नायब तहसीलदार (नेवासा) डी. एम. भावले यांची नियुक्ती केली आहे.

हायटेक एअर प्रोडक्ट्स (एमआयडीसी) येथील प्लांटवर रिपाेर्टींग ऑफिसर म्हणून उपजिल्हाधिकारी उज्ज्वला गाडेकर आणि इन्चार्ज ऑफिसर म्हणून तहसीलदार वारुळे व नायब तहसीलदार राजू दिवाण यांची नियुक्ती करण्यात आली आहे. त्यांच्या अखत्यारीत तीन पथके कार्यरत असतील.

ऑक्सिजन रिफिलर यांना ऑक्सिजन उत्पादक कंपन्यांकडून प्राप्त झालेल्या ऑक्सिजनच्या दैनंदिन नोंदी घेणे, प्राप्त ऑक्सिजन पूर्णपणे वैद्यकीय कारणाकरिता वितरित होत असल्याची खातरजमा करणे, ऑक्सिजन रिफिलर यांच्याकडून गैरवैद्यकीय कारणासाठी ऑक्सिजनपुरवठा होत असल्यास आवश्यक ती कारवाई करणे, ऑक्सिजन रिफिलर यांच्याकडून वितरण झालेल्या हॉस्पिटलच्या नोंदी ठेवणे, तसेच उपलब्ध करून देण्यात आलेली ऑक्सिजनची मात्रा याबाबतही नोंदी ठेवणे, रिफिलिंग प्लांटवरून निघालेला ऑक्सिजन वितरण करावयाच्या हॉस्पिटलला पूर्ण क्षमतेने प्राप्त झाल्याबद्दल खात्री करणे आदी कामे या पथकांकडे सोपवण्यात आली आहेत.

ऑक्सिजनचा वापर गैरवैद्यकीय कारणासाठी होत नाही, ऑक्सिजन वितरण करावयाच्या हॉस्पिटलला पूर्ण क्षमतेने प्राप्त झाल्याबद्दल खात्री करणे, उपलब्ध करून देण्यात आलेली ऑक्सिजनची मात्रा याबाबतची नोंद ठेवणे यावर नियंत्रण ठेवण्यासाठी नगर जिल्ह्यात जिल्हाधिकारी डॉ. राजेंद्र भोसले यांनी सहा पथकांची नियुक्ती केली.