महाराष्ट्र
3472
10
बिबट्याच्या जबड्यात पतीचं डोकं, ठोसे लगावून पत्नीने पतीचा जीव वाचवला;आधुनिक सावित्री!
बिबट्याच्या जबड्यात पतीचं डोकं, ठोसे लगावून पत्नीने पतीचा जीव वाचवला;आधुनिक सावित्री!
नगर सिटीझन live टिम प्रतिनिधी
पारनेर तालुक्यातील दरोडी चापळदरा इथे काल (28 मार्च) ही घटना घडली.
बिबट्याच्या जबड्यात पतीचं डोकं पकडलं होतं. पती मृत्यूचा दाढेत असतानाही पत्नीने हिंमत न हरता त्याशी झुंज दिली. तिच्या धाडसामुळे, प्रसंगावधनाने पतीचा जीव थोडक्यात वाचला आहे. गोरख पावडे असं बिबट्याने हल्ला केलेल्या पतीचं नाव असून संजना पावडे असं या धाडसी पत्नीचे नाव आहे. सोमवारी (28 मार्च) मध्यरात्री ही घटना घडली.
पौराणातील कथेनुसार सावित्रीने यमाकडून आपल्या पतीचे प्राण परत मिळवले. अहमदनगर जिल्ह्यात अशीच आधुनिक सावित्री पाहायला मिळाली. बिबट्याच्या जबड्यात पतीचं डोकं अडकलेलं असतानाही त्याच्याशी झुंज देत पत्नीने त्याला पिटाळून लावलं आणि पतीचे प्राण वाचवले.
रात्रीच्या वेळी जनावरांच्या गोठ्यातून आवाज येत असल्याने गोरख पावडे हे गोठ्याकडे गेले. बिबट्या गोठ्यात आला होता. गोरख पावडे तिथे पोहोचताच बिबट्याने त्यांच्यावर हल्ला करत अक्षरशः त्यांचे डोके जबड्यात घेतलं. गोरख यांनी आरडाओरड केल्याने पत्नीने तिकडे धाव घेतली. संजना यांनी स्वत:च्या जीवाची पर्वा न करता थेट बिबट्याचे पाय आणि शेपटी जोरात ओढली आणि बिबट्याच्या पोटात बुक्क्यांचा मारा केला. तर त्यांच्या पाळीव कुत्र्याने मालकाला वाचवण्यासाठी बिबट्याच्या गळ्याचा चावा घेतला. गोरख पावडे यांचे वडील दशरथ यांनी दगडाने बिबट्याचा प्रतिकार केला. त्यामुळे बिबट्याने तिथून धूम ठोकली.
पावडे कुटुंबियांनी दाखवलेल्या एकजुटीने गोरख पावडे यांचे प्राण वाचले. बिबट्याने जबड्यात डोकं पकडल्यामुळे गोरख पावडे यांना दुखापत झाली आहे. त्यांच्यावर रुग्णालयात उपचार करण्यात आले. दरम्यान त्यांची पत्नी संजना पावडे यांनी दाखवलेल्या धाडसाचे आता परिसरात कौतुक होत आहे.
3472
10
