महाराष्ट्र
3899
10
गावस्तरावर पथकामार्फत कारवाई करण्याचे आदेश
गावस्तरावर पथकामार्फत कारवाई करण्याचे आदेश
नगर सिटीझन live टिम प्रतिनिधी
जिल्ह्यात कोरोना रुग्णांची वाढती संख्या लक्षात घेता प्रतिबंधात्मक उपाययोजनांचे काटेकोर पालन आवश्यक आहे. नियमांचे उल्लंघन करणाऱ्या व्यक्ती आणि आस्थापनांवर आता जिल्ह्यात स्थानिक प्रशासनामार्फत कडक कारवाई कऱण्याचे निर्देश जिल्हाधिकारी डॉ. राजेंद्र भोसले यांनी दिले आहेत. सर्व यंत्रणांनी त्याप्रमाणे कार्यवाही करावी. ग्रामस्तरापर्यंत विविध पथकांमार्फत कोविड सुसंगत वर्तणुकीचे पालन होईल, यासाठी पुढाकार घेण्याच्या सूचना निवासी उपजिल्हाधिकारी संदीप निचित यांनी सर्व तालुकास्तरीय यंत्रणांना दिल्या आहेत.
कोरोनाच्या संभाव्य तिसऱ्या लाटेच्या अनुषंगाने करावयाच्या कार्यवाहीसंदर्भात जिल्हा प्रशासनाने तयारी सुरु केली आहे. त्याचा आढावा निवासी उपजिल्हाधिकारी संदीप निचित यांनी घेतला. उपजिल्हाधिकारी डॉ. अजित थोरबोले, उर्मिला पाटील, पल्लवी निर्मळ, अतिरिक्त जिल्हा आरोग्य अधिकारी डॉ. दहिफळे, जिल्हा रुग्णालयाच्या निवासी वैद्यकीय अधिकारी डॉ. बांगर, मनपा वैद्यकीय अधिकारी डॉ. राजूरकर, जिल्हा आपत्ती व्यवस्थापन अधिकारी डॉ. विरेंद्र बडदे आदी जिल्हा मुख्यालय येथून तर उपविभागीय अधिकारी, तहसीलदार, गटविकास अधिकारी, मुख्याधिकारी हे तालुका स्तरावर उपस्थित होते.
जिल्ह्यात कोरोना रुग्णांची वाढती संख्या लक्षात घेता नियमांचे उल्लंघन करणाऱ्या आस्थापना आणि व्यक्तींविरुद्ध कारवाईची मोहिम तीव्र कऱण्यात आली आहे. तालुका प्रशासनाने आता ही मोहिम अशाच प्रकारे कायम ठेवून संसर्ग रोखण्यासाठी उपाययोजना कराव्यात. ज्याठिकाणी जास्त प्रमाणात रुग्ण आढळून येत आहेत, तो भाग प्रतिबंधित करुन त्याठिकाणी मोठ्या प्रमाणावर चाचण्या करण्यात याव्यात. स्थानिक गावांचे सरपंच, इतर पदाधिकारी यांनी गर्दी टाळण्यासाठी आणि संसर्ग रोखण्यासाठी पुढाकार घ्यावा, असे आवाहन केले.
3899
10
