महाराष्ट्र
15661
10
पदवीधर मतदारसंघाच्या मतमोजणीसाठी यंत्रणा सज्ज; २८ टेबलवर होणार मतमोजणी
पदवीधर मतदारसंघाच्या मतमोजणीसाठी यंत्रणा सज्ज; २८ टेबलवर होणार मतमोजणी
नगर सिटीझन live टिम प्रतिनिधी
नाशिक विभाग पदवीधर मतदारसंघाच्या निवडणुकीची मतमोजणी दि. २ फेब्रुवारी रोजी सय्यद पिंप्री येथील गोदामात होणार आहे. मतमोजणीसाठी संपूर्ण यंत्रणा सज्ज झाली असल्याची माहिती प्रशासनाकडून देण्यात आली आहे.
तर अधिकारी व कर्मचारी यांचे मत मोजणी प्रशिक्षणपूर्ण झाले आहे.
मतमोजणी प्रकिया
नाशिक पदवीधर मतदारसंघासाठी नाशिक विभागातील पाच जिल्ह्यांत एकूण 1 लाख 29 हजार 456 मतदारांनी मतदान केले. याची मतमोजणी सय्यद पिंप्री येथील गोदामात 28 टेबलवर होणार आहे. एका टेबलावर एक तहसीलदार आणि दोन नायब तहसीलदार यांची नेमणूक करण्यात आली आहे. सर्व मतपेट्यामधील मतपत्रिका एकत्रित करून त्यांचे एक हजाराचे गठ्ठे करण्यात येतील.यानंतर बाद मतपत्रिका बाजूला काढून वैध मतपत्रिकेवरून कोटा ठरविण्यात येणार आहे. त्यानंतर प्रत्यक्ष मतमोजणीला सुरुवात होणार आहे, अशी माहिती विभागीय आयुक्त राधाकृष्ण गमे यांनी दिली.
अशी करण्यात आली आहे तयारी
मतमोजणीच्या अनुषंगाने मतमोजणी कक्ष, निरीक्षक कक्ष, सुरक्षा कक्ष, माध्यम कक्ष, केंद्रावरील टेबल रचना, प्रकाश व्यवस्था, विद्युत पुरवठा, आरओ, एआरओ बैठक व्यवस्था, उमेदवारांसाठी बैठक व्यवस्था तसेच आवश्यक त्या कक्षांची उभारणी करण्यात आली आहे. मतमोजणी कक्षात मोबाईल घेऊन जाता येणार नाही. मतमोजणीसाठी नेमलेल्या अधिकारी-कर्मचारी यांनी आपले ओळखपत्र सोबत ठेवत जबाबदारी देण्यात आलेल्या ठिकाणीच थांबावे तसेच उमेदवारांनी नेमलेल्या मतमोजणी प्रतिनिधी यांनी देखील नियुक्ती दिलेल्या ठिकाणीच थाबावे, असे आवाहन निवडणूक प्रशासनाच्या वतीने करण्यात आले आहे.
सय्यद पिंप्री येथील नव्या शासकीय गोदामात मतमोजणीची संपूर्ण तयारी झाली आहे. या कामासाठी नियुक्त ३०० कर्मचाऱ्यांसाठी बुधवारी अंतिम प्रशिक्षण सत्र होणार असल्याचे सहायक निवडणूक निर्णय अधिकारी तथा उपायुक्त (प्रशासन) रमेश काळे यांनी सांगितले. गुरुवारी सकाळी आठ वाजता २८ टेबलवर मतमोजणीला सुरूवात होईल. प्राथमिक मोजणीत १२ फेऱ्या होतील. नंतर पाच फेऱ्या होतील. मतमोजणीसह अन्य कामांसाठी ३०० कर्मचाऱ्यांची नेमणूक करण्यात आली आहे. मतमोजणी स्थळावर कुठलाही अनुचित प्रकार घडू नये म्हणून २५० अधिकारी आणि कर्मचाऱ्यांचा बंदोबस्त तैनात राहणार आहे.
गुरुवारी सकाळी आठ वाजता २८ टेबलवर मतमोजणीला सुरुवात.
प्राथमिक मोजणीत १२ फेऱ्या, नंतर पाच फेऱ्या.
मतमोजणीसाठी ३०० कर्मचारी.
२५० पोलीस अधिकारी-कर्मचाऱ्यांचा बंदोबस्त.
.तर मतमोजणी लांबणार
निवडणुकीत पसंतीक्रमानुसार मतदान झाले आहे. मतमोजणीच्या प्राथमिक फेरीत एखाद्या उमेदवाराने कोटा गाठल्यानंतर निकाल लागू शकेल. पण कुणाला कोटा गाठता न आल्यास मोजणीच्या पुढील फेऱ्या कराव्या लागतील. त्यामुळे मतमोजणी लांबू शकते, असे निवडणूक यंत्रणेकडून सांगण्यात आले.
15661
10
