महाराष्ट्र
1615
10
कोठेवाडी येथे ग्राम सुरक्षा यंत्रणेचे प्रात्यक्षिक संपन्न
कोठेवाडी येथे ग्राम सुरक्षा यंत्रणेचे प्रात्यक्षिक संपन्न
पाथर्डी - प्रतिनिधी
पाथर्डी पोलीस स्टेशन हद्दीतील कोठेवाडी गावात, सर्व गावाला आपत्कालीन परिस्थितीत एकाच वेळी सूचना देणे, निरोप देणे, सावध करणे किंवा मदतीला बोलवण्यासाठी जगातील सर्वोत्तम आपत्कालीन संपर्क यंत्रणा असणाऱ्या ग्राम सुरक्षा यंत्रणेचे प्रात्यक्षिक नुकतेच अहमदनगर जिल्हा पोलिस दलाच्या वतीने घेण्यात आले.
२६ ऑगस्ट रोजी पाथर्डी तालुक्यातील कोठेवाडी गावातील रमेश कराळे यांच्या बंद घराचा दरवाजा उचकटून दोन अज्ञात इसम घरात चोरीच्या उद्देशाने प्रवेश करतात. घराशेजारील राहणाऱ्या विष्णु कोठे यांना ही बाब लक्षात येताच त्यांनी ग्रामसुरक्षा यंत्रणेच्या टोल फ्री नंबर वर( 18002703600) कॉल करून सर्व गावाला सावध केले. त्यांचा कॉल ग्रामसुरक्षा यंत्रणेच्या माध्यमातून तात्काळ कोठेवाडी गावाच्या हद्दीतील ६०० नागरिक, पाथर्डी पोलीस स्टेशन चे सर्व ९५ पोलीस अधिकारी व कर्मचारी यांनाही घटनेची माहिती मिळाली, चोराचे वर्णन कळाले. पोलिसांनी ग्रामसुरक्षा यंत्रणेद्वारे नागरिकांना न घाबरण्याचे आवाहन केले व दहा मिनिटात गावात पोलिस हजर झाले. प्रत्येकाने आपापल्या परीने सावधानता घेत घराचा घेराव केला. घरातून चोर बाहेर येताच उपस्थित नागरिक व पोलिसांनी सदर चोरांना जेरबंद केले व सर्वांनी सुटकेचा निःश्वास सोडला. अशाप्रकारे ग्राम सुरक्षा यंत्रणेचे प्रात्यक्षिक करण्यात आले.
पोलिसांनी सर्व नागरिकांना सविस्तर माहितीसाठी गावातील मंदिरात एकत्रित करून मार्गदर्शन केले व नागरिकांना ग्राम सुरक्षा यंत्रणेत सहभागी होण्याचे आवाहन केले. ग्राम सुरक्षा यंत्रणा ही संकल्पना मनोज पाटील जिल्हा पोलीस अधीक्षक आमदनगर यांचे मार्गदर्शनाखाली अहमदनगर जिल्ह्यातील सर्व गावात कार्यान्वित करण्याचे काम सुरू आहे. ग्रामसुरक्षा यंत्रणेत सर्वच गावांनी कायमस्वरूपी सहभागी राहण्याचे मान्य केले. ग्राम सुरक्षा यंत्रणेचे संचालक डि.के.गोर्डे यांनी प्रात्यक्षिकानंतर सर्व ग्रामस्थांना यंत्रणेच्या वापराबाबत मार्गदर्शन केले. ग्रामीण भागात गावात, वस्तीवर घडणाऱ्या चोरी, दरोड्याच्या घटनांत स्थानिक नागरिक व पोलीस कर्मचारी अधिकारी यांना तात्काळ सावध करणे, सूचना देणे, मदतीला बोलवण्यासाठी उपयोगी असणाऱ्या ग्राम सुरक्षा यंत्रणेची प्रात्यक्षिक यशस्वीरित्या पार पडले.
यावेळी सरपंच संजय चितळे, उपसरपंच विष्णु कोठे, पोलीस पाटील वसंत वाघमारे, गोरक्ष कोठे, रमेश कराळे, बाळू गायके, आजिनाथ चितळे, किरण कोठे, बाळू कोठे, दत्तू कोठे, तुकाराम कोठे, मिराबाई कोठे, आसराबाई कोठे, झुंबर कोठे, राहीबाई कोठे व गावातील बहुसंख्येने ग्रामस्थ उपस्थित होते.
सदर यंत्रणा नागरिक व पोलीस यांच्यात संपर्काचे प्रभावी माध्यम आहे. प्रात्यक्षिक यशस्वी होण्यासाठी सुदर्शन मुंडे उपविभागीय पोलिस अधिकारी शेवगाव, अनिल कटके पोलीस निरीक्षक स्थानिक गुन्हे शाखा यांच्या मार्गदर्शनाखाली सुहास चव्हाण पोलीस निरीक्षक पाथर्डी व पाथर्डी पोलिस स्टेशनचे सर्व अधिकारी व कर्मचारी यांनी विशेष प्रयत्न केले.
1615
10
